眾所皆知，周三（5日）晚快活谷將上演國際騎師錦標賽，各地好手雲集。其中，曾攞過全球最佳騎師獎的澳洲猛將OK哥布文，除跑騎師賽四關賽事外，亦有練馬師早洞悉先機，提供座騎予布文在同晚其他場次上陣。

邊位廐主咁識貨用OK哥？梗係近年和他合作愉快的大摩啦！周三晚谷中四班1200米，摩廐「猴王駒」便會夥拍布文搏殺。

現年五歲的「猴王駒」於上季出道，先由文家良訓練，之後拉去麥菲文馬房（已解散），都未能上名。

「猴王駒」今季再改投大摩，雖然已在摩廐四戰也未勝，但其實表現明顯進步，大前仗於同程谷草1200米入Q只負馬頸位，已站在勝利邊緣。

本身近兩仗也跑得接近，鞍上人是韋達，今次換上布文壓陣，發揮方面令人有信心得多。

布文近年集中於沙田大賽日在港客串，惟以他的身手跑谷草當然勝任愉快，而他對上一次在谷草贏馬是2016年12月7日，於騎師賽關次勝出「首映」，結果他榮膺該屆騎師賽總冠軍。