【潘燦良做廢中】果燃台編輯推介《風景》 《中英街》盧鎮業戀上女友母親
袁彌明潘燦良編輯推介果燃台
《蘋果》
果燃台 本周編輯推介影意志獨立電影《風景》 https://bit.ly/2KTzxCS,是許雅舒執導的第三部長片,為2016年南方影展的開幕電影,片長三小時。本文簡介劇情,幫助大家消化。
故事分四線,熟悉的演員包括潘燦良、廖子妤、袁彌明、盧鎮業(《中英街1號》)。盧鎮業與陳敏兒(香港舞蹈年獎得獎者)一段曖昧母子戀以及「新香港人」廖子妤搶去不少風頭。
電影以2011年港人呼應佔領華爾街的「佔領中環」為中心點,貫串保衛皇后碼頭、菜園村、反高鐵、新界東北、反國教,最終以傘運收結。虛構人物穿插於真實的運動場景,難怪有人形容
《風景》 是社運史詩。
其實
《風景》 更像剪貼簿,一時劇情,一時是紀實;有時是個人反省,有時是口述地區史。像打開很多窗子,隨時伸頭進去,可以看到不同風景。
【3D懷舊電影《豉油西餐》】
《逆流大叔》潘燦良戲中飾演富二代格言,參演3D懷舊電影《豉油西餐》,阿爺19歲帶著家族醬油秘方由廈門偷渡來港,發跡變成香港大地主。
快必譚得志(不是C君)飾演的《豉油西餐》導演,一身打扮談吐神似「護旗手」彭浩翔。世事都被導演許雅舒看透了,難怪片名原本不叫
《風景》 ,叫《偽現世》。
富不過三代,潘燦良飾演的格言終日無所事事,他只是一個憤而廢的中年;一夜在蘭桂坊認識了神秘少女蝦米,一整晚驚驚青青會衰十一。
「有乜嘢死人冧樓唔該唔好搵我。」記者兼舊愛阿敏(袁彌明飾)說。敏看不起他,說他功利,就是家傳秘方都能賣。格言矢口否認:「黐線!我幾衰都唔會咁做!」
敏:咁我上次同你拗嗰塊地呢?
格言垂頭:賣咗
敏:挑!咁你有乜嘢唔賣得呀?我提多你一次,古洞塊地你唔可以賣!
格言:咁緊張做咩?想復合呀?
佔領中環(OC)已近水尾,格言才去湊熱鬧參加,體驗抗爭者另一種生活風景。不是14年的OC,是11年10月的OC。佔領區設在中環滙豐總行地下,行動長達11個月——響應美國佔領華爾街「一起佔領」(Occupy Together)運動。
格言比葉劉淑儀瞓「棺材房」還要貼地,他瞓橋底。有留守者分了個麵包給他:「食吖!」
潘燦良有點驚訝:「真係?多謝晒喎!邊個咁好人買咁多都麵包請人哋食?」
「唔係買㗎,我哋喺酒店執番嚟,不過係趁佢哋未落漂白水之前……」
潘燦良馬上丟掉麵包:「黐線㗎你哋!黐線㗎垃圾俾人食!死人㗎!」
有人耐著性子解釋,潘燦良又叫了:「做生意係咁㗎啦!唔做生意你有工返?」他發怒了:「你自己冇錢,你唔好憎啲有錢人呀!學我阿爺話齋,如果唔係我阿爺,你哋豉油都冇得食呀!
「 係我阿爺返去開廠先嘅!佢搞地產買地起樓呀,你哋先有樓住咋,廢柴!」
恩主潘先生尚繼續發表偉論,太初(盧鎮業飾)已經一記衝上前想打他。
【你究竟仲識唔識得嬲?】
小野盧鎮業飾
《風景》 另一男主角太初,影片一開首就是他,目送被屈襲警的女友明宜(高凱琳飾)登囚車。
盧鎮業既是獨立電影導演又是演員,《中英街1號》及下月公映的《花椒之味》還躍身大銀幕。許鞍華監製的《花椒》,麥曦茵身兼編、導之職,鄭秀文主演,鍾鎮濤飾演其父。
《風景》 裡的太初,一直投身社運,比07年保衛皇后碼頭更早,然後是年年7.1、菜園村、反高鐵。苦行,跪地。阿宜熾烈如火,太初靜穆如太初。但冷靜無用,抗爭者除了被判入獄,一無所得。
太初相信無政府主義,正職是茶記廚房,母親也是獅子山下一代人,辛苦置業,還是難逃清拆命運。「好彩仲有間公屋啫!」她說。
生於中產家庭的阿宜,07年讀中三,母親帶她去參與保衛皇后碼頭。「我唔知呢個碼頭有幾特別,我第一次感受到,好多人一齊,重視一個地方。
「媽咪第一次同我講舊事,佢話要嚟保衛皇后碼頭,係因為呢個係一個對佢好重要嘅地方。每個星期,公公都會帶媽媽嚟碼頭,等婆婆收工,兩個人望住個海發呆。」畫面是當年保衛皇后珍貴片段。那個夏夜,阿宜才發現母親原來平時很少話。
「我好似俾皇后點起咗一把火,一發不可收拾。」她在獄中寫信給太初,問他:「我唔知有啲乜嘢,係會令你一發不可收拾。」就像反高鐵那個很冷的冬天,他捉實了她,擔心她會衝。阿宜看到他眼裡:「你究竟仲識唔識得嬲?」
【愛上女友的母親】
阿宜入獄前,曾叮囑太初要代她照顧母親雲(陳敏兒飾)。父親另結新歡,阿宜入獄,馬鞍山的「小型豪宅」裡只有雲。導演許雅舒曾說,「馬鞍山在我看來是一個虛假的豪宅區。看似規劃完善,每天出入可以看見雲石大堂,感覺自己像是住在很好的地方。但其實一切都是很虛假的。」
雲在窗前看風景。但原來根本沒有風景。「當你困喺入面嘅時候,其實我同樣失去咗自由。或者我一早已經失去自由而唔知道,但你比我更快知道。所以即使你返咗嚟,只不過係一齊跌入一個更大嘅監倉。我每日望住窗外嘅景色,我唔記得咗,原來係冇景色,只有一個一個窗口。」
太初沒有去探望阿宜,但去了看她的母親。不明來歷的恐嚇和騷擾不斷,家中只有她。他去看了她,緊緊抱住她,吻了她。
雲:我真係好後悔,真係好後悔帶阿宜去皇后碼頭。阿宜好開心,佢以為去咗嘉年華會,我哋兩母女好耐冇試過開開心心去街。但係依家,我真係好後悔,好後悔。如果唔係我,你根本唔會知道呢個仆街政府仲衰過你老竇!
太初:你可唔可以試下對自己好啲?
雲:你哋保衛你哋嘅皇后碼頭就得,我連我個皇后都保護唔到!
太初:你唔係間屋,你係你自己呀!
他們還一起到了長洲。她摸了摸他的臉,不知是想起女兒還是情人;他像照顧女友或母親一樣,為她撐傘擋太陽。
太初:我有啲擔心你
雲:如果你想……
太初:我想尊重你
雲:如果你想依家返出去,仲趕到班船出中環。
太初沒回答,只是抱著她,沉默良久才說:「我唔知應該點做。」
雲忽然說:「你哋佔中嗰陣係點樣得到共識㗎?即係,點樣去決定一件事?」用社運經驗來談情。
【努力做「新香港人」的廖子妤】
《風景》 另一條線,是大陸新移民李彌和香港人男友阿彥,由廖子妤、岑珈其(曾參演《逆流大叔》、《翠絲》等電影)飾演。
阿彥是太初的好友兼同事,安排李彌暫住在太初母親位於深水埗的小房間裡。阿彥不問世事,只管玩樂和性愛,從不了解李彌有多想融入「新香港人」的身份:外表、口音、言行,裝扮成道地香港人。為了「成為香港人」,她找了一個香港人當男朋友。
李彌:我哋舖頭依家做緊折扣優惠,睇啱可以話我聽。
顧客A(向B私語):你話佢係咪大陸人?
顧客B:真係唔知喎,依家越嚟越難分㗎喇。分唔到先驚。
拿了永久居民身份證後,毅然辭工、分手,開創自己的網店事業,有自己的身份。
「果燃台」 只限升級壹會員閱覽,立即成為升級壹會員!
-----------------------------
【每周送10萬】
升級壹會員獨家尊享,立即參加
10萬火急大抽獎 !
*推廣生意的競賽牌照號碼:52302-9
廢中潘燦良怒罵佔領人士:「如果唔係我阿爺,香港會有咁風光?個個返大陸開廠、魚翅撈飯呀?」(《風景》影片截圖)
廖子妤飾演的李彌,打扮言行跟足道地香港人,但仍被識破。
背景是銅鑼灣書店。(《風景》影片截圖)
公公婆婆講地區史部份,由袁彌明負責。這部份是紀實。(《風景》影片截圖)
陳敏兒飾演阿宜的母親雲,女兒入獄,女兒的男友盧鎮業答應了要照顧她,豈料最終發展成曖昧關係。(《風景》影片截圖)
潘燦良在蘭桂坊遇到的神秘少女蝦米(余淑培飾),每天在舊式樓宇、天台自拍,她說這是影遺照。(《風景》影片截圖)
李彌問蝦米:「你唔覺得香港啲天空好細?深水埗還好,如果你喺銅鑼灣、中環,你睇到嘅天空係一個格一個格。香港其實有好多窿位可以睇出去。香港好好㗎,我好鍾意香港。」(《風景》影片截圖)
深水埗一格格的天空。而且快將消逝。(《風景》影片截圖)
敏(袁彌明飾)問格言(潘燦良飾):「你連阿爺嘅故仔都拎嚟賣,幾時賣埋條秘方?」(《風景》影片截圖)
蝦米笑格言:「你今晚問左我好多次,我今年十九歲。」(《風景》影片截圖)
格言說要送部相機給蝦米,蝦米笑他:「你啲有錢人係咪好鍾意買嘢送俾人?咁不如你買支水俾我。」格言打開銀包,她看了看,笑:「其實你都冇錢嘅。」(《風景》影片截圖)
2009年反高鐵的克警,跟現在分別是否很大?(《風景》影片截圖)
阿宜獄中書信寫道:「我真係有諗過我哋會贏。我以為感動到四千人包圍立法會抗議財委會我哋就會贏。」(《風景》影片截圖)
李彌的目標是成為真正的香港人,男友阿彥只想吃喝玩樂。(《風景》影片截圖)
2012年佔領中環清場,戲中潘燦良力阻盧鎮業衝,不想他出事被捕。(《風景》影片截圖)
雲在窗前看風景。但原來根本沒有風景。「當你困喺入面嘅時候,其實我同樣失去咗自由。或者我一早已經失去自由而唔知道,但你比我更快知道。所以即使你返咗嚟,只不過係一齊跌入一個更大嘅監倉。我每日望住窗外嘅景色,我唔記得咗,原來係冇景色,只有一個一個窗口。」(《風景》影片截圖)