「馬神」馬德鐘大前日同友人開P狂歡，而49歲生日正日就孖老婆張筱籣飛去杜拜嚟個生日trip，咁啱噚日係佢哋結婚24周年，馬太喺facebook貼出當年婚照，回想當年佢哋入行仲做緊model，馬太po相留言：「又到今天！你生日完又結婚周年，我差點忘記了！原來已結婚24年，怎麼可以那麼久，好恐怖呀！」

轉眼就24年，佢哋個囝囝馬在驤已經19歲，chok過老竇馬神，不過睇翻馬太貼出嚟嘅舊相，嘩！馬神好食咗「防腐劑」咁，無論樣貌身材都冇咩點變。

馬太噚晚仲放閃，貼出佢哋夫妻喺杜拜嬉水相，馬神赤膊晒胸肌，馬太出動比堅尼晒驕人上圍，二人仲胸對胸玩selfie，見佢哋笑容一致，好有夫妻相，馬太留言：「多謝你馬德鐘抽空安排這45度火炙兼帶點驚喜的結婚24周年旅程，還有更多浪漫嗎？」睇嚟馬太冧爆老公呢個驚喜之旅噃，而馬太此行仲有另一目的，就係齊齊去撐囝囝游泳比賽。