任總初次返鄉下東莞常平,僅約10歲,曾被一班頑童用自製「火箭」灼傷,令佢對「鄉下」嘅印象頗差,自此一直冇返過去。
直到1988年,任總再次踏足內地,佢形容係「出乎意料的旅程」,佢好清楚記得,當日係1988年12月3日星期六,而且係「天朗氣清,凉快舒適」嘅冬日。任總嘅「特別任務」,就係負責到文錦渡迎接由魯平(後來官拜國務院港澳辦主任)率領嘅5人中方小組,去到當時港督衛奕信嘅別墅,同當時嘅財政司翟克誠率領嘅5人英方小組舉行會議。
呢場會議對任總有「舉足輕重」嘅歷史意義。當日中英雙方首次正式討論「香港設立金融管理局構想」文件,任總以「毫無疑問,是次會議已經為香港設立金融管理局撒下種子」形容會議,促使當日身為副金融司嘅任總,成為掌管金管局帥印16年嘅第一位金管局總裁。
會後,任總親送魯平等人由文錦渡返去內地,並接受魯平嘅邀請,踏足中方土地。雖然呢次「回鄉」時間極短,但呢段歷史,任總又點會忘記呢?
李華華