【改編BL小說】《延禧攻略》成全球熱搜劇冠軍 黃曉明拍于正新劇
延禧攻略鬢邊不是海棠紅于正黃曉明
2018年差唔多到尾聲,全球最大嘅搜尋網站,就公佈咗各項熱搜關鍵字,當中全球熱搜電視節目榜,大陸劇《延禧攻略》打入十大不特止,仲擊敗美劇成為榜首。
製作人于正嘅《延禧攻略》,起用新人吳謹言、許凱等主演,今年推出即令中港台,甚至馬來西亞等亞洲地區,牽起追劇熱潮。今次《延》劇更打破美劇壟斷情況,擊敗第二位、Netflix嘅科幻美劇《碳變》(Altered Carbon),至於第三位就係泰國電視劇《天生一對》。
成為製作紅人嘅于正,繼《皓鑭傳》之後,開拍嘅新劇《鬢邊不是海棠紅》備受注目,究竟今次于正搵新人定搵當紅小生擔正呢?噚日《鬢》劇喺橫店開鏡,男主角終於揭盅,由黃曉明、尹正主演,兩人分別飾演富商程鳳台、京劇名伶商細蕊。由於原著係網絡BL小說,最令網民好奇,劇中會否出現男男曖昧情節。不過于正暗示劇集符合大陸審查標準,即係唔會出現男男嘅愛情線,至於呢個劇嘅故事,講述一個愛國商人為咗保護中國京劇而作出嘅努力。
精選娛聞,喺晒《娛果》
http://fb.com/appledailyent