鄭欣宜今日到新城宣傳新歌《你是甚麼時候開始不愛我的》，兼宣佈自己成立新唱片品牌「Passionate Fruit Record」，佢話：「要好多謝老闆蕭定一，喺佢旗下唱片公司部門度，開一條新line畀我，等我做自己鍾意做嘅嘢，同一啲我合作得好開心嘅同事同幕後一齊做音樂。」

問到會唔會簽其他歌手返嚟？欣宜笑稱：「我係公司唯一一個artist，等我試吓做幾年一姐先，之後先簽男歌手返嚟做一哥，或者再簽組合，總之就唔會簽女歌手返嚟。」欣宜補充o依家話簽人係言之尚早，俾啲時間做吓先。

問到係咪投資好大？佢冇正面回應：「阿一對我好好，俾到個好好嘅配套，我好多謝佢。」咁爸爸鄭少秋知唔知道你自組公司？欣宜話：「爸爸知道咗好耐，佢忙緊澳門演唱會所以冇煩佢，但如果佢想送我一個旅行獎勵我嘅，我會好多謝佢。」