歐聯決賽一席率先由祖雲達斯奪得，餘下一席就會喺香港時間今晚深夜誕生，馬德里體育會回師卡達朗球場，力圖收復首回合作客0:3輸畀皇家馬德里嘅失地。雖然形勢極度不利，但馬體會上下並未打算投降，教練施蒙尼喺周二賽前記招表示：「如果球員呢場賽事仲要我鼓勵爭勝，咁我應該執包袱走人。我哋知道自己身陷咩處境，但我對球員充滿信任，佢哋會踢出一場精采賽事。」另外，大約有500名球迷喺下塌酒店門外迎接收操大軍，邊點煙花邊唱歌叫口號，鼓勵球隊戰至最後一滴血：「入4粒畀我哋睇！」搞到唔少馬體會球員都攞起手機拍低呢個激昂畫面。

面對主隊蓄勢反擊，皇馬隊長沙治奧拉莫斯喺賽前記招亦不甘示弱，揚言唔係馬體會先識踢拼搏同熱血足球：「坊間有印象以為所有皇馬球員都喺比華利山出生，但我哋都有球員來自街頭，同樣堅守原則同態度。」據西班牙傳媒報道，拉莫斯呢番話喺更衣室發揮正面作用，有球員表示：「係時候有人出聲啦。」可以士氣高昂出戰同市宿敵！