2020年對於古明華而言，絕對是「來回地獄又折返人間」的真實寫照，在事業上，已屆56歲的古佬，今年初離開工作了26年的無綫，人到中年，離開了一個「comfort zone」，卻撞正世紀疫情，全球經濟受到嚴重衝擊，正當工作上前路茫茫之際，古佬健康又出現問題，在3月時因膽囊問題要緊急接受手術，病情一度令他痛得死去活來，最後割走膽囊，又要挖開肚皮洗乾淨內臟，以免膽液感染其他器官和腹膜引致腹膜炎，結果手術成功，給他留低了一條長長疤痕做「紀念」，送走了15磅肥肉。

日前古佬接受《蘋果》專訪，眼前的他清減不少，當日「圓碌碌」的「蘇基」已經消失。古佬說：「我喺呢幾年都病咗幾次，割膽只係切膚之痛，係好痛好痛，係我自己個人感受，喺嗰刻，我係痛到忘記晒所有嘢，痛到唔知自己仲有老婆同女。」作為男人，古佬最痛莫過於在摯愛面前展示自己軟弱的一面，不願意看到別人憐憫目光，亦自責不能好好保護所愛的人。

古佬回想2016年亦患上肺病，身心飽受煎熬：「嗰陣醫生話我有肺結核，仲同我講可能有cancer，我喺醫院隔離咗14日，好無奈又痛苦，『古明華』人真係好唔合格，點可以令身邊嘅人咁擔心？有乜嘢資格搞到佢哋咁？而且我有太多嘢未放得低，有太多嘅責任要承擔，喺呢啲時候係接受唔到，相比之下，經歷嘅痛苦係痛過今次，係心靈上好痛苦。」

古佬還說：「我人生經歷得越多，就越有體會，好似喺2、3年前，有記者朋友問我，有啲乜嘢想同啲後輩講，咁我就話盡量唔好有咁多後悔嘅嘢，但係呢一刻我反而會講，盡量唔好留低遺憾，因為遺憾嘅嘢，即係代表你冇時間去做，追溯唔到，可能係你死咗都糾正唔到，對人嚟講，真係一件好殘忍嘅事，當然，人生係一定有遺憾，重要嘅係唔好留低太多，如果你相信有下一世，相信有輪迴，係未必會原諒自己上一世留低嘅遺憾。」

正因為做人不可以留低遺憾，在這個史無前例的困境，古佬亦有很深的體會：「人同人之間，無論係親人、朋友都好，喺一個好順境嘅情況下，係lost咗好多嘢，冇把握一啲好重要嘅嘢，當一個大難嘅時候，呢個疫症有好多人走咗，有好多人冇咗個親人，但係喺呢個情況下，好多人先會去珍惜，留返住一啲嘢，點解我哋唔喺一個好好嘅環境，好平安同健康嘅時候，唔識去珍惜呢啲嘢？呢個疫症當然係好殘酷、好負面，但係喺過程中畀咗好多正面嘅訊息我哋，我哋要好好把握幸福，留住啲寶貴嘅光陰。」他續說：「不過個天好好，會提醒返在生嘅人，應該要點樣做。有時我哋不能夠太自私，應該將個胸襟放喺人哋嗰度，睇返成件事，將你掛念，思念，要care嘅嘢，放遠啲，唔好淨係擺喺自己個身體入面，一個人真係好微不足道，將所有嘢畀佢哋，等佢哋畀你知，你係有幾大，你嘅存在係有幾深。」

回復自由身的古佬，最近與麥長青、張松枝、敖嘉年、艾威和袁富華參與ViuTV真人騷《中佬唔易做》，體驗人到中年轉行難處，鏡頭前當然可以關關難過關關過，不過回到現實世界，轉行是否真的那麼容易？

一度認定演員是終身職業的古佬無奈地說：「喺疫情之後，離開咗TVB，其實生活原來唔係咁狹窄，原來生活係有好多選擇，今次係體會到原來每個職業都有佢難做嘅地方，但係並不是難做就唔去做，有時為咗生活，去到某一啲情景之下，必定要轉變，好似打開報紙，相信有啲職業我哋都可以去選擇，問題係你用乜嘢心態同姿態去做。如果你覺得自己仲係古明華，喺電視係一個幾好嘅綠葉，冇理由去做呢啲嘢嘅話，不如去死喇，根本唔應該喇，而家係去到冇得選擇，係需要轉工，仲咁堅持？你估嗰啲斤両值幾多錢？當你需要放開身段去選擇嘅時候，睇吓你係抱乜嘢態度，當你係抱一個正確嘅態度，任何困難同選擇都可以接受。」

古佬還表示這個選擇應該是早兩年發生，只不過計劃往往趕不上環境的變化，最終令他改變了選擇，事隔2年，要來的始終要來，唯一可以做的事，只可以接受：「出到去咪知道，有好多嘢都擔心唔嚟，好似疫情，邊個會估到呢個疫症會持續半年，又要戴咁耐口罩？我諗唔會有人預計到呢樣嘢，但係呢樣嘢係真真正正發生咗。」他續說：「有時我都追溯番呢幾十年工作，究竟係為咗啲乜嘢呢？其實好簡單有句說話叫做『平凡是福』，以前從來都冇深究過究竟係乜嘢一回事，不過自從喺TVB配咗音之後，發覺如果我只係配音，幸福就已經喺度，因為我唔需要咁辛苦咁周圍撲，咁點解仲要辛苦返去拍戲？但係後來戰勝唔到自己嘅心魔，因為我做過演員，喺拍戲搵到嘅快樂，並唔係平凡幸福入面可以畀到你，所以人生真好多無奈嘅事，當你洞悉咗平凡是福，但係偏偏唔去把握，而係去繼續勞碌，但係呢個勞碌係會欣然接受，喺我自己立場，能夠應付到自己嘅生活，能夠提供到一個正常物質畀屋企人，等佢哋可以安安樂樂，其實係已經足夠。之後我就會再去選擇，我做呢份工係有乜嘢意義，我鍾唔鍾意，可以帶到啲乜嘢畀觀眾，原來觀眾睇古佬做戲係開心喎，喺我個立場嚟講，都係一個貢獻。」

撰文：唐琛悠
攝影：陳慧安

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新