【新增短片】
民主黨舉行23年黨慶晚宴，喺九龍灣筵開60圍，特首林鄭月娥一落機就即刻去咗現場，嚟足超過一小時認真畀面，除咗現身，林鄭仲捐出3萬元，贊助立法會前議員李華明唱一曲《笑看風雲》，配合其他贊助，一首歌仔為民主黨帶來32萬元捐款。林鄭事後喺Instagram分享現場照片時，其中一個標籤寫住「#大和解」。民主黨今晚成場晚宴共籌得500萬，惟去年晚宴共籌得760萬，即今年少咗260萬。

呢場民主黨晚宴，三位司長同部分局長都有現身酒會，但晚宴前就走人。民主黨安排林鄭、政務司前司長陳方安生、民主黨前主席劉慧卿坐上主家席，同一枱仲包括盛智文、李鵬飛、梁家傑、詹培忠。

林鄭進場入座主家席前，與陳方安生握手，其後再與劉慧卿、李永達握手，就俯身問候李鵬飛，之後才入座，坐喺民主黨主席胡志偉同埋盛智文中間。不過林鄭同陳太席間冇咩交談，林鄭主要都係同盛智文傾偈。

民主黨喺席上播出搞笑短片，希望各界捐款，其中一幕係曾經企喺特首梁振英身邊、聽到CY自言特首地位好超然時打咗個突嘅特首辦助理處長（傳媒）黎日正Anson，被調至日內瓦海外辦事處一事時，林鄭睇到亦忍唔住笑咗出嚟。

前民主黨、喺新界東補選嘅范國威噚日都有現身，Gary話，自2010年退黨後再冇嚟過民主黨黨慶，覺得民主黨黨慶比起以前大型咗好多，多咗好多不同政治光譜嘅人士出席。晚宴上，除咗李華明唱歌，胡志偉都有唱，為黨籌得5萬元。劉慧卿則率領一眾民主黨女將，包括嘉賓之一、公民黨陳淑莊上台高唱《上海灘》，為民主黨籌得60萬。

《蘋果》沙士15周年系列網站，正式登場：
https://hk.feature.appledaily.com/sars15/