人肉舉手機器三呼萬歲之後，中央人民政府批准辭職，曾爵士正式發表參選宣言：
由爵士夫人親筆題書十二字真言：「強政勵治，締造和諧，福為民開」，正式響鑼，批准老公御駕出征！
呢十二個字，望落好似另有含義：「強政」，暗示上台後有大搞作，兼有別於前朝董某嘅「弱政」。「勵治」，即是實幹執行，暗示公務員要水流暢順，做嘢要講效率！
或者驚「強政」兩個字嚇親公僕，以為佢係咪想郁人，於是就補飛，話係「締造和諧」，唔使標冷汗住！至於「福為民開」呢？就即是遙遙咬實胡錦濤喺大陸「以民為本」嗰句三響炮：「權為民所用，情為民所繫，利為民所謀」。
爵士加一句，叫做「福為民所開」，既冇扮鸚鵡又曲線融入胡溫新政嘅主題曲，高招呀！
跟住又柳暗花明，突然引一句歐戰領袖金句：「給我們工具，我們會完成任務」，邊個歐戰領袖咁巴閉呀？原來係英國前首相邱吉爾喎！曾蔭權係爵士，邱吉爾又係爵士，煲呔一啲都毋須避嫌，證明有自信，大家咁高咁大，唔怪得心靈相通喇！

訓政講話宣撫老左

為照顧愛國老左陣營嘅弱小心靈，曾爵士同時又召見咁多年嘅「大紫荊」得主，發表訓政講話，以示宣撫！原來曾爵士嘅國際視野同人類歷史立足點雖然高深好多，白雪公主，亦都好樂意同七矮人進行親切友好嘅對話！
曾氏競選宣言，通篇睇落，啲語文清爽咗好多，個Feel好唔同，充滿感性，睇嘢有遠有近，而且一洗前朝董噏風式嘅假大空泡沫，亦唔見甚麼「打造乜乜平台」、「作出物物貢獻」等大陸八股，重內啄胡錦濤精神，外Lam邱吉爾情操，場面大過《天國驕雄》！
嗱係咪？咁先叫似番個香港領袖講嘅嘢吖嘛，做唔做得到就另一回事，或者睇吓肥龍點樣舞嗰張大關刀，同埋煲呔佢本人落區「拉票」，點樣學肥彭當年嘅食蛋撻人文精神嘞又！

傳真︰2623-9278
電郵︰[email protected]