經濟分析師Eric睇兩電利潤管制諮詢文件，再睇報章評論、議員意見，Eric感嘆：「以後唔使做經濟分析，最緊要做政治分析。啲友仔都唔講經濟實例、實證分析嘅，淨係講政治──唔准加價，要減價，要引入競爭，佢哋都唔知自己講乜。只有一張《信報》社論（二月一日）提及紐約底特律大停電、意大利大停電……呢篇社論有理據、有邏輯。以後我叫啲下屬做經濟分析，當例行公事，自己就全力評估政治風險。如果上頭批准筆直嘅話，我打算請一個具備四年立法會議員助理經驗嘅人，當係睇住立法會風險。」

Eric似乎不無道理。例如工聯會立法會議員王國興本係民建聯東區區議員，葉澍堃在立法會講機管局上市諮詢文件之時，王國興竟然問佢：「你有冇諮詢過北京，攞到中央政府祝福？」葉澍堃一面無奈，支吾以對，只係話考慮到每一方意見，小心行事。究竟葉澍堃有冇問過中央呢？係唔係一定要問過中央呢？以後王國興對每一個局長都問相同問題嘅話，局長會好頭痛，如果凡事問中央，中央ＯＫ晒嘅話，立法會保皇黨一定支持，使乜辯論吖，使乜研究經濟分析吖。
Eric探到機管局為咗私有化，已經做咗好多工夫，同中央有關?相關部門攞意見，基本上知道冇人反對，先至敢去馬。呢啲事，葉局長冇理由唔知嘅，佢自己係機管局董事喎，咁點解葉局長唔敢正面回答王國興嘅無厘頭質詢呢？Eric覺得好唔舒服，從表面睇，佢認為葉局長唔想得罪啲毫無技巧嘅議員，日後推動機管局上市，一定唔敢去盡，對於兩電利潤管制協議亦然。既然如此，做咁多經濟分析，可能係浪費時間。