【同性婚姻香港未合法】鄧達智婚宴 司儀盧覓雪：如果有人反對，都係坐低啦
蘋果日報 2017/09/09 19:50
盧覓雪婚宴鄧達智Clement
鄧達智今晚同男友陳梓欣喺尖沙嘴舉行200人婚宴，司儀就由盧覓雪擔任，盧覓雪話識咗鄧達智好耐，由做記者已經識，好難得到咗今日都冇反面，仲可以做到朋友。盧覓雪又話：「鄧達智睇嘢好廣，有時睇嘢會聚焦咗一點，我都有同佢講都有今日喇。」
問到送咗咩禮畀鄧達智，盧覓雪就話只係送咗紅紙一張，問到做司儀會唔會玩啲咩，佢就話：「我都係應一對主人家嘅意願，佢哋唔想太傳統，都係由我點玩就點玩，都只係以分享為主，今次呢個婚禮都有少少震盪香港，但大家都唔使緊張，呢件事喺香港都唔合法，如果現場有人反對，都係坐低啦，係冇用嘅。」
攝影：卓寶花
盧覓雪係今日婚宴司儀，一對主人家話唔想咁傳統。
呢次男男婚宴，盧覓雪話香港人反對都冇用嘅，可以坐番低。
今日婚宴設計好用心，logo都別出心裁。