周國賢今日喺灣仔接受dbc數碼電台訪問,佢透露11月15日喺九展StarHall舉行演唱會,今次係計6月復工以來,第2次開個唱,佢話:「9月初都開過一場,但嗰次有好多人買唔到飛,今次可以容納3000人,不過4個鐘已經賣晒,啲人叫我唔好低估自己,所以依家已經入紙申請紅館,如果成事都要明年,我好開心,好感恩,復工4個月已經極速返番去兩年半前嘅工作狀態。」
周國賢又指喺9月頭嘅個唱入面,唱到第二首歌已經忍唔住喊,佢話:「因為呢兩年半太高高低低,仿如隔世,為免今次忍唔住喊,最近成日睇韓劇,令自己冇咁眼淺。」佢仲透露今次會請圈中好友做表演嘉賓,其中一位男歌手,仲係喺佢谷底時,令佢拎番起支結他重新出發。