噚日個市冇晒鑊氣，皆因內地A股跌咗1%。回顧歐債2011年8月爆發之前，非指數股份走勢跟隨A股多過恒指，近排好似有番呢個迹象，所以揸住非指數股份，𠵱家可能要睇住A股做人。至於恒指，壞消息出得七七八八，應該唔會太差，博反彈勝算偏高，如果睇噚日趨勢，藍籌股稍後有可能強勢過非指數股份。
事實上，大部份非指數股份過去幾個月升得八八九九，估值由低殘升到去合理水平，要搵好強勢、有大升潛質嘅股份，一定要配合基本因素突然好轉先得，談何容易！嚟緊幾個月，炒股要贏錢就要貼中個市，但好難有大茶飯食，直至市場出現例如美國QE2嘅重大事件，令整個市場估值明顯上升為止。

有條件升上5.5元

綜合上述形勢，投資者唔應該繼續重錘買股，要由進取、贏唔得多對唔住自己嘅心態，Tune down到去有得贏就算。總而言之，就算短線呢浸比較睇好，都毋須太大貪，因為心太雄，貪字最後得個貧。
呢個時候，投資者可以留意冷門股，落個雞仔注，博贏三幾成利潤，好過冇。
晉佳其中一隻心水冷門股係復旦張江（8231），呢隻股主要係開發皮膚性病同腫瘤治療藥物，嚿年頭三季賺3,130萬人仔，按年增長4倍，單計第三季賺1,509萬人仔，已經相當於上半年利潤，睇嚟呢間公司開發藥物進入增長期。雖然以第三季利潤年度化計，市盈率達到38倍，但一隻藥股出現開發成果之後，盈利可以有爆發性表現，前景唔可以睇小，完全冇得估頂。
更重要係富達同劉央分別喺1月16日同2月4日，靜雞雞買咗1,400萬同1,780萬股，雖然平均價喺1.70元同1.94元，明顯低過現價，但都證明隻嘢似有料到，所以基金先會爭住買。
如果以另一藥股羅欣藥業（8058）市值67億元打個七折，復旦張江長遠有條件升上5.50元，現價追，一路升就一路放紙鳶，如果買完唔對路，就設定跌穿3元止蝕。

晉佳
本欄逢周一、三及五刊出