「如果去到一個人一間房唱會唔會好怪？」
「定係同個receptionist講仲有人嚟，一個人唱住先？」
「我接受到自己一個人食飯行街睇戲，不過唱K都係唔得，試過行到門口不過最終冇入去！」
「扮飲醉酒去開房唱，冇人敢笑你。」
「唔覺得毒，因為真心想唱歌」
「K Lunch 35蚊包兩杯無酒精飲品，識飲識一定飲Fruit punch！」留意番，呢個係十年前價錢，依家已經升價到79蚊，K Lunch一定有嘢食，但有冇花生蝦條就要視乎年代。

一個人唱K以前叫做「毒」，長佔「孤獨指數」十大。依家？係「潮」。

一人K，之前「一夜之間」席捲全中國，進駐各大商場，顧客可以隨時走入去唱歌。一首歌9蚊港紙，「禁歌」都有得唱。(新聞連結:　 http://bit.ly/2wSaE58 )

依家就連香港都跟風玩一人K。

成個「毒」字寫在臉上嘅小明，都走咗去唱一人K。同大陸一樣，都係一個電話亭咁樣樣，兩張高凳。一人前。

小明揀中午去，銅鑼區，若無其事，推門便入。一條毒L，揀歌都揀咗一輪，都係八九十年代嘅哥，即係，用walkman聽嗰種，陳百強張國榮譚詠麟一定冇走雞。唱功舞姿達登台功架。的確，小明除咗飆高音有啲「飄」之外，基本上係音準嘅。

「小明」係邊個？喺無綫劇中經常演儍仔、毒男、閒角甲乙丙丁，甚至無名。佢喺《皆大歡喜》古裝版，短短兩年，演過八個角色。有傳媒形容佢係「御用傻仔」。

但見到佢個樣一定會認得，現年45歲，獨身。佢叫戴耀明。係呀，好鍾意佘詩曼嗰個。

唉，無論毒定獨，好似都同小明扯得上關係。唱完K，小明仲去咗玩具反斗城，揸玩具槍自己同自己玩。眾樂樂都不如毒樂樂。

好可能真係會唔講唔知，小明入無綫做演員之前，參加過新秀，當年唱嘅係同樣由新秀出身嘅黃翊首《哭着笑》，不過呢日小明冇唱呢首，反而揀咗佢嘅登台飲歌、張國榮嘅《Monica》，唱到大汗疊細汗，完全沉醉喺自己嘅世界入面，越睇越毒。

小明話：「啲人覺得我硬係媾唔到女，而且又係好騎呢，其實做人有好多方面，不過毒起上嚟，我真係好可以好毒！」

有幾毒？

「唔好介意，其實我幾享受一個人大便嘅時候，雖然嗰陣係有陣味，但係你身邊真係肯定唔會有人，只係得四面牆圍住，真係relax！」

Ooops！篇文有味……

小明繼續解說：「呢個時候，我真係可以諗到好多嘢，會有好多靈感嗰一刻。有時諗吓工作，諗吓點樣搵錢，亦有時會諗吓點樣可以做好場戲。好奇怪，如果真係好煩嘅時候，就算已經完咗事。我都好享受坐喺廁所板，但係一定要喺自己屋企先得，喺公廁或者朋友屋企都唔可以。」係，公共廁板多菌。

小明話呢個習慣係出嚟做嘢開始有，到讀書嗰陣就最愛一個人坐巴士：「我最鍾意喺冇乜人嘅時間一個人搭巴士，仲會揀上層左手邊最後嘅窗口位，唔知點解，坐其他位會唔舒服，我由中學嗰陣開始，已經有呢個癖好，嗰陣會用walkman聽陳百強同哥哥（張國榮）啲歌，o依家大個咗，間唔中都會去坐，成個感覺真係好浪漫。」

查實小明之所以予人有毒男嘅錯覺，主要係因為佢喺劇集做過唔少呢類角色，好似佢喺《EU超時任務》對住水晶梨譚凱琪「動L」最為經典。小明話：「其實係錯覺，動L毒咗啲，但係唔關我呢個阿哥事，係兄弟毒啲；之前有一套古裝戲，話我鍾意陳煒，要匿埋喺門昅住佢，監製鍾意，我又冇所謂，最緊要觀眾鍾意，完成任務，做娛樂圈都係娛樂觀眾，笑咗咪OK，對社會有啲貢獻。」

場地提供：RedMR 紅人派對@皇室堡

（下篇睇毒男講脫獨）