「第38屆香港電影金像獎」頒獎典禮，將於周日（14日）舉行，今屆入圍「最佳新演員」的電影界新力軍，當中有兩屆視后37歲的胡定欣、劇場小生36歲的陳湛文、模界型男36歲的栢天男、主題樂園演員34歲的姬素·孔尚治，以及才23歲的編劇畢業生林善。雖然他們都是首次拍電影，但他們的演出經驗亦有不少，只有林善從沒演戲經驗，亦是當中最年輕的。

《G殺》林善
年僅23歲的林善憑電影《G殺》獲提名「最佳新演員」，早前他在九龍塘接受《蘋果》訪問，談到他5歲開始學大提琴，直至17歲考文憑試才停下來：「我爸爸係教琴，我有學鋼琴、豎琴，如果要成為專業音樂家，需要天分。考DSE時要考慮係咪讀音樂，我幾種樂器都學到8級以上，但自覺去唔到更高層次，認定自己唔會成為專業音樂家，應該向其他方面發展，當時我嘅興趣就係讀電影。」2017年在演藝學院修讀編劇第3年的林善，要拍10分鐘劇情短片交功課，他負責編劇，故事寫一個拉大提琴的中學生，不想人生被媽媽操控而反抗的故事，當劇本是林善寫，這個角色與他相似，自然非他莫屬。

林善完成短片功課後，恰巧《G殺》於facebook做演員招募，角色正是大提琴樂手，他說：「我知齣戲係『香港首部劇情片電影計劃』得獎作品，角色同我嘅短片角色有啲接近，我就抱住嘗試嘅心態報名試鏡。冇諗過電影角色會喺facebook搵演員，試鏡時冇諗過戲份咁重。由招募到試鏡到演出，有好多幸運因素同緣份，咁啱喺暑假，而且要識拉大提琴，時間上又配合到，我見到齣戲招募唔係必然，演到齣戲係幸運。」林善最初沒有告知家人去當演員，「冇同屋企人講參與演出，我又怕醜唔想咁多人知道，等齣戲出街先講，佢哋知道會好雀躍。」

林善正為香港電台新導演項目單元劇計劃做副導演，同時為一部電影做前期資料搜集，他表示會報名參加鮮浪潮比賽。畢業還未夠一年的他仍在摸索，他說：「演員、編劇，自己都未肯定邊樣合適自己，演戲好難好抽象，技巧同理論我唔識，今次演戲都係憑直覺同聽導演去調整。編劇雖然讀咗4年，但編劇係好深奧，路好長，我會乜都試。」

《三夫》陳湛文
36歲的陳湛文（Peter），本身是舞台劇演員，首次演陳果的電影《三夫》擔正做男主角，雖然他在舞台劇界曾獲「最佳男配角獎（喜劇／鬧劇）」，但在電影界首次入圍，他仍是戰戰兢兢。25歲才考入演藝學院表演系的Peter，比同學較年長，但他比其他人更努力，故他在校期間獲多個獎學金，更以藝術學士（榮譽）畢業。首次拍電影，便來一部三級片，且戲中有不少性愛場面，以此為起點，如何面對家人？Peter說︰「坦白講，我冇同屋企人講過，唯一同身邊人提及，就係我嘅未婚妻，我哋今年9月會結婚。」

當日Peter接過劇本，早知戲中有不少性愛場面，但演員就是這樣，要面對從未演過的角色，從而挑戰自己，「知道有咁嘅尺度，係糾結過，臨拍之前，當自己係外國演員，對自己胴體冇忌諱，都幾戰戰兢兢，拍完之後，好似過咗一關咁。」Peter向來有留意陳果導演的作品，今次能演對方的戲，他既驚且喜，「陳果導演嘅作品，總係有劃時代，既反映現時本地人生活狀況，又有前瞻性和預言，我仍有迷思，究竟我哋3個老公畀困局小妹（戲中女主角），定係小妹個病帶來我哋4個嘅災難呢？」

《逆流大叔》胡定欣
入行16年的胡定欣，曾奪兩屆視后，論演技無庸置疑，但她去年才首次拍電影，更憑《逆流大叔》入圍「最佳新演員」，早前定欣接受傳媒訪問時直言︰「呢件事好有趣。」定欣回想當年入行時，跟吳鎮宇合作劇集《衝上雲霄》，今次是對方找她合作。將來會否轉戰電影圈？定欣表示︰「電影圈我係新人，仲有好多嘢要學，希望可以跟唔同嘅電影人合作。」

《淪落人》姬素·孔尚治
來自馬尼拉的34歲姬素·孔尚治（Crisel Consunji），2008年接受香港迪士尼樂園的邀請來港擔任演員，原本8個月的短期合約，誰知至今已在港踏入第11個年頭。從小接受舞台演出訓練的她，習慣在台上面對觀眾，她回想在facebook看到演員招募，當時她內心掙扎良久才鼓起勇氣參加面試，「在菲律賓我主要做舞台表演，看到這機會時，起初我還不太肯定，因舞台和電影是完全不同世界，坦白說我花了很長時間去考慮，因為我害怕，幸好最後我成功把握到。」首次參與電影演出的她，即獲「最佳新演員」提名，她非常驚喜︰「我答應演出是因為我相信這個故事，得到大家認同，已經是很大榮幸。」

《L風暴》栢天男
36歲的栢天男，今次憑電影《L風暴》入圍「最佳新演員」，獲悉提名當天，他開心不已，他說︰「最初好怕俾人知我係演員，因為自己功夫唔夠，但入咗圍之後，算係有少少成績，公司對我的栽培冇白費，對自己嘅目標更清楚，有提名我已經好滿足。」自小在澳洲長大的他，在澳洲讀大學時修讀藝術與設計，畢業後曾從事設計行業，雖然他的中文程度有限，但他的父母曾在香港生活，故他於2011年決定來港闖一闖，由當模特兒做起，到現在成為電影圈的生力軍。

-----------------------------
追蹤真相 守護公義
免費訂閱支持蘋果 4月10日無阻盡覽
https://hk.adai.ly/PMtkKQIUBV
-----------------------------
動腦Q金像獎周
4月8日-12日 10:30PM
Let’s Q the money！Action！
https://hk.adai.ly/zpCd06PPwV