盛傳田二少蠢蠢欲動想同大佬睇齊，去馬參加地區直選，極有可能喺今年立法會選舉去九龍西博一博。九西𠵱家係男人天下，劉千石、涂謹申、馮檢基同曾鈺成都係舊面孔，田二少同呢幾位麻甩比較，外形同形象上好唔同，加上有新鮮感，話唔定可以成為新晉師奶殺手。
佢嘅好朋友兼「未來」黨友方剛力撐田二少去馬，佢話九龍塘係中產區，田二少應該有唔少捧場客，而且田二少歌喉唔錯，比大佬田少一曲走天涯只係識唱《分飛燕》好好多，他日搞地區活動，田二少大可以歌會友，將拉票大會當係演唱會咁搞。
方剛則留守批發及零售界，佢話老婆嬲佢連任四年，已經放棄咗佢咁話，今年競選太太唔慌會幫手助選。方剛咁慘，八方認為選民應該考慮吓成全佢，唔好令佢夫妻傷和氣。