67歲嘅馬來西亞人周仰杰,11歲開始跟爸爸學造鞋,認為手造高跟鞋最靚,相信機器無法取代手藝。佢話:「𠵱家整鞋係由機啤出嚟,鞋胚同鞋底嵌入去就得。但以前手工造鞋,由一塊皮革開始,由畫草圖設計鞋款,全部要自己做。」
手造高跟鞋需時最少兩至三星期完成,每對幾千蚊至過萬元,周仰杰認為價錢合理,因為「一對鞋嘅價錢包括時間,仲有造鞋師傅嘅手工,當然亦要計埋舖租與人工」。
幾十年來,周仰杰招呼唔少名媛明星,講到最難滿足要求嘅客人,佢首選準新娘。佢話:「為新娘訂製鞋最具挑戰,佢哋多數早6個月籌備婚禮,我哋先要睇咗婚紗款式,然後按新娘要求不停修改,可能體型有變又要再改、再造,直至結婚當日為止。」
周仰杰喺2001年前賣走品牌股份,近年較多時間做慈善工作,但佢對造鞋熱情從未減退,身上必定帶住設計師嘅孖寶,就係素描簿與十幾支marker,一有靈感就立即畫低。
佢透露,未來有機會去內地發展高級鞋履市場,至於會否來港開業,就要視乎緣份。
李華華
mailto:
[email protected]