澳門上個月賭收罕有地出現按年下跌，想知道跟住澳門賭業會繼續衰落去，定會谷底反彈？打開個月曆就自然會搵到答案。

澳門賭業基本上是阿爺主導的政策行業，賭場內最捨得洗錢，最識得輸錢，通通都是強國土豪，意味阿爺可以控制住賭場的收入來源。澳門賭收可唔可以谷底回升，就視乎阿爺會點樣同澳門「眉來眼去」。

揭開個下半年個月曆一望，8月份澳門選特首、10月國慶黃金周，加埋12月澳門特首換屆兼回歸偉大祖國母親懷抱15周年，單單都是大件事。香港亂象已經在國際「響晒朵」，澳門當然唔可以再失守淪陷。阿爺要營造一片歌舞昇平，安居樂業的「河蟹」景象，畀多少少賭收當維穩費，用經濟粉飾太平亦都應該，不然澳門政府點可以繼續年年派錢。上半年中央已率先出手打銀聯，打L簽，打貪官豪賭，一輪整頓過後，相信下半年濠賭又可以重新上路，同時又可以為明年多個新賭場開幕鋪定一條光明大道。

根據世界銀行的最新數據顯示，蕞爾小島的澳門人均GDP已經跑贏瑞士，籌碼的威力遠超當年的杏仁餅。博彩已經成為澳門的經濟命脈，乜太話齋「虎毒不吃兒」，阿爺點會親手玩死澳門呢？

顏昭昭