臨近聖誕，電玩巿場鬥到難分難解，SonyComputerEntertainment（SCEH）喺平安夜灣仔會展舉行嘅亞洲遊戲展大晒冷，提供逾百款遊戲供機迷任玩，包括出年3月先推出嘅PS3賽車遊戲GT5。未有參展嘅微軟Xbox360梗係唔畀對家威晒，明日起到翌年1月3日喺銅鑼灣怡和街香港大廈地下，設立咗一個遊戲人氣館，show盡一啲即將出街嘅新games畀啲機迷免費玩，玩完之後仲可以獲贈免費福袋，內有最hit嘅遊戲預告片DVD、遊戲年曆等，真係又食又拎。

北極熊遊戲老少咸宜

噚日小藍拜訪Xbox360嘅玩機達人Steve，佢特別推介機迷一定要試玩聖誕先有得賣嘅新Game《Bayonetta》，喺日本獲遊戲雜誌評為滿分，故事內容係講魔女同天使大鬥法。小藍即場駁埋高清薄屏電視試玩，啲畫好細緻，場景好華麗，女角體態撩人，打鬥場面流暢，盡顯高清嘅威力。
Steve又話，另一款遊戲《PolarPanic》啱晒聖誕一家大細試玩，內容係北極熊一家被拐，熊爸爸前往營救家人途中，點樣設法推倒同破壞捕獵者設下嘅冰雪陷阱。其他供試玩遊戲仲有電影異獸戰嘅《AliensvsPredator》、經典遊戲炸彈人《BombermanLive：Battlefest》。