唔少藝人都會帶埋小朋友去中環嘅歐陸嘉年華玩，除咗李嘉欣同囝囝Jayden之外，陳豪同大住肚嘅陳茵媺早幾日都帶埋二仔陳浩鋒現身嘉年華。今日係嘉年華最後一日，唔少人都趁機會去盡興吓，而噚日就輪到張栢芝同大仔Lucas以及細仔Quintus再去玩，就連好少露面嘅吳鎮宇太太王麗萍，都帶埋囝囝Feynman同栢芝一家三口一齊去玩，幾咁熱鬧！

讀者譚小姐噚晚透過蘋果《爆相爆片》報料，話噚日下晝5點幾喺中環個嘉年華撞見栢芝同兩個囝囝，同行仲有吳鎮宇太太同囝囝，但就唔見鎮宇出現。譚小姐話本來佢同小朋友排緊隊玩蟲蟲過山車，點知排排吓突然有幾個工作人員帶住栢芝成班人一齊上去玩過山車，唔駛排隊就入去，當栢芝好似女皇咁看待。記者問現場有冇人不滿鼓噪？譚小姐就話冇，因為好似去迪士尼咁，都不時有VIP唔駛排隊入場玩。

栢芝同Lucas坐喺過山車頭位，Quintus同媽咪啲朋友以及王麗萍同囝囝就坐喺後幾排位置。臨開車嗰陣，栢芝又玩電話又傾電話，忙個不停。譚小姐話Lucas同Quintus對於玩過山車嘅反應都係一般，唔似得Feynman咁，離開嗰陣仲鬼死咁high。

栢芝喺2004年曾經同吳鎮宇合作拍過電影《小白龍情海翻波》，但至於佢點解同吳鎮宇老婆咁老友，就不得而知了。