張敬軒、Twins、許靖韻同一班港台DJ，今日一齊去到九龍塘一所婚宴會場，為改編自創作人李敏而成廣播劇《結婚·花·車》舉行記招，當被司儀問到幾時結婚，軒仔同Twins異口同聲指要儲下錢先，跟著軒仔再指同台DJ嘅面相應該明年結婚，身旁蔡卓妍(Sa)即問：「咁我面相點？」軒仔就話：「妳要睇全相先知。」鍾欣潼(阿嬌)笑住話：「睇下妳好唔好生養。」阿Sa當場失控喪笑。

阿Sa話軒仔成日講黃色笑話，軒仔就話只係調下味，兼且只係熟先講，喺女性面前都唔會提器官字眼，廢事變咗性騷擾，佢話：「我係跟校長(譚詠麟)學嘢，令工作環境輕鬆開心啲，但我冇學到真傳，只係偏門學壞。」

嚟緊後晚首次網上直播音樂會，原先軒仔諗住一個人做，但公司安排樂隊伴奏，佢大讚網絡年代好犀利，好似今次都係瓊姐剪條片諗到可以咁升降轉key，所以要好好運用網絡宣傳自己。

阿Sa對於軒仔話睇全相建議話：「My pleasure，佢講嘢成日好好笑，佢個腦唔知諗乜。」劇中阿嬌迫拍拖多年嘅男友結婚，佢指現實生活都冇試過拍咁耐拖。另外阿Sa指讀書時都似劇中角色咁主動追男仔，但每次都感覺到對方也有意思先開聲，問到試過食檸檬未？阿Sa得戚話：「真係未囉。」現時都有女性向男伴求婚，阿Sa話自己唔介意，佢話：「我都好希望有求婚一part嘅。」