韓國KBS電視台音樂節目《Music Bank》，自2011年起到世界各地舉行韓流騷「Music Bank World Tour」，演唱會噚晚喺香港亞博館舉行，係節目繼2012年後相隔7年再來港開唱。

演唱會由韓劇《男朋友》男星朴寶劍、女團TWICE成員多賢及前有線主播陳貝兒擔任主持人，約於晚上7時半，由男團MONSTA X成員亨源擔任DJ，夥拍隊友周憲揭開序幕，TWICE、Seventeen、MONSTA X、Ailee、NU'EST W、FT Island等藝人依次現身，率先向粉絲打招呼。

男團NU'EST W打頭陣演出《Help Me》、《Dejavu》等歌曲，組合去年9月先訪港開騷，雖然僅相隔4個月就再度見港迷，但4子亦賣口乖表示好掛住粉絲，成員Ren更晒廣東話「我愛你哋」冧粉絲，而成員白虎心口被發現貼上膠布，估計係用以遮擋紋身。

朴寶劍等司儀隨後現身Chit Chat，朴寶劍指NU'EST W嘅演出好有魅力，令佢諗起周潤發、張國榮，仲即場郁身郁勢跳《阿飛正傳》中嘅曼波舞。女歌手Ailee接力晒唱功，勁歌熱舞《U & I》、《I will show you》等歌曲，並深情獻唱人氣劇《鬼怪》OST《如初雪般走向你》。Ailee之後又孖Seventeen嘅S.coups、Vernon、Woozi組成特別組合獻唱《Q&A》，令粉絲相當驚喜。

出道4年嘅男團MONSTA X，喺演出時表示係首度參與「Music Bank World Tour」，7子都大感興奮，又不停派心心冧粉絲，組合唔止演唱《Shoot Out》、《Rush》等熱門歌，又大跳男團2PM歌曲《Heartbeat》，成員元虎更撕開恤衫大騷肌肉，引得粉絲尖叫，不過喺演出《Dramarama》前，成員亨源枝咪出現問題冇聲，其他成員就撒嬌救場拖時間。

樂隊FT Island相隔2年再齊人訪港演出，期待已久嘅粉絲更高舉「We Wait U」嘅燈牌，令5子大表感動，FT Island更驚喜獻唱Supper Moment歌曲《To Whom》，雖然廣東話發音唔算好標準，但誠意十足。男團Seventeen隨後亦特別表演普通話歌《那些年》，引得台下粉絲大合唱。

人氣女團TWICE嘅Momo、Mina、多賢及彩瑛先演唱SHINee成員泰民嘅《Move》，展現性感魅力，之後就孖隊友唱跳《Yes or Yes》、《TT》等熱門歌，至於台灣成員周子瑜雖然日前受到死亡威脅，導致佢出發來港時、抵港後都冇乜表情，但佢仍敬業演出，喺現場笑得相當開心。男團Seventeen就壓軸演出，勁歌熱舞《Clap》、《Oh My!》等人氣歌曲。朴寶劍隨後晒廣東話說：「大家睇得開唔開心？多謝大家光臨。」而全體藝人亦齊齊上台，到台前同粉絲近距離接觸，並不停揮手示意。

完場後大會例牌開燈，粉絲亦準備離開，點知眾藝人再度現身，拋毛巾落台，引起粉絲瘋搶，並為三小時嘅演出畫上句號。而朴寶劍、TWICE等人完成演唱會後，當晚就離港返韓國，眾人都顯得疲憊。

精選韓流，喺晒《娛果》
http://fb.com/appledailyent