美國流行樂天后Britney Spears會於今日坐私人飛機到港，並於星期二於亞博開show。Britney今次呢個亞洲巡迴，去到邊都會感受下當地文化，至於上一站佢就啱啱去完泰國，仲同兩個囝囝餵象又同扮到佢一樣嘅男fans唱歌。

Britney嚟亞洲開show個個都好雀躍，佢更加係首次來港。今日佢就專程坐私人飛機，早少少嚟香港行下睇下。至於剛過去嘅上一站泰國，佢都有到處去遊覽，仲同兩個囝囝Sean Preston、Jayden James去咗間布吉嘅大象收容所餵象。另外，演唱會之後佢都有去後台見fans，一班泰國fans就非常有心，男fans唔單止着上佢好出名嘅紅色戰衣，仲同佢合唱《Oops！I did it again》，搞到佢非常high：「呢班fans令我今日好完滿！」唔知香港一班觀眾又會唔會令Britney都咁開心呢？