正所謂福無重至，禍不單行，宏霸數碼（802）主要股東陳振聰輸完爭產官司，又涉嫌偽造文件，都算運滯。咁都唔止，宏霸噚日宣佈，應勤民辭任執行董事同首席營運官，標誌住一班陳振聰舊部全部離開宏霸。

應勤民最遲走

呢輪撤離潮，要由去年2月講起，陳振聰軍師、主席兼行政總裁朱偉民率先辭任，調任執行主席，當時副主席兼首席營運官周白瑾同日請辭，只擔任非執董。直至去年10月，朱偉民連執行主席個位都退埋，周白瑾亦辭去非執董。至於應勤民由04年起做首席營運官，係最遲撤離嘅舊部屬。
宏霸執董人數越嚟越少，財務官個位又未補番。到陳振聰得閒見吓班管理層時，都唔知仲認得幾多人。