中環威靈頓街嗰間翠華，一向都有不少白領選擇喺度食午餐，而一到咗夜晚，更係喺蘭桂坊蒲完歇一歇嘅好去處。而最為人熟悉嘅，絕對係舖頭入面嘅大光燈！

相信唔少人都知道，蘭桂坊啲舖頭入面全部都黑麻麻，乜嘢都望唔真。如果你喺老蘭識咗個新朋友，而大家又咁啱傾咯，就梗係要落威靈頓街間翠華坐一坐。事關翠華入面啲燈真係夠哂光猛，畀餐廳入面盞大燈照一照，對方係點嘅樣都睇清楚哂啦！

不過，由聽日起呢間分店就要同各位暫別，喺十一月尾翻新後再同大家見面。今日喺暫別派對記者會上，翠華都好有心，特地準備咗一啲卡片燈（pocketlamp）俾一班記者。

主席李遠康位二公子李祉鍵（Kenji）笑言，嚟緊兩個月翠華裝修，大家都無得落嚟照燈，所以特登準備咗呢份小禮物頂住檔先。佢又話，整個暫別派對準備時間比較緊湊，只係用咗兩三個禮拜，主要都係邀請一班老朋友同熟客。

但係橫睇掂睇，盞卡片燈嘅Watt數好似唔係幾得，同舖頭喺啲燈差好遠喎。

記者：江靖然

掌握財經生活資訊，即Like「蘋果ATM」fb專頁啦！
http://fb.com/appledailyatm