許冠傑（Sam）同譚詠麟喺噚晚開鑼嘅《阿Sam & 阿Tam Happy Together》演唱會完騷後，接受傳媒訪問。其中見到阿倫手指有啲損，佢話：「因為當時握手位，保安比較緊張，隻手反一反我，所以拍到我手踭，不過冇乜事嘅，係手指有少少損。」提到佢哋兩個唱到唔願停，好似唱到11點59分，阿倫話：「哎，好彩你哋做證，罰就罰梗㗎喇！因為搭半（11點半）就開始會罰。」問佢哋嚟緊啲演唱會場次會唔會cut歌？阿倫透露：「會短番啲，因為之後冇嘉賓㗎喇。」佢仲話李香蘭嗰part只係得一晚有。

唱到超晒時，係咪太多歌要唱？阿Sam話：「係呀，唱極都唱唔晒我哋啲歌。」阿倫接住笑：「唱7日都唱唔晒啦！但到時會有少少歌改動，尤其係日場，會唱啲比較係冷門啲嘅。」阿Sam就透露每晚會換幾支歌。

講到成晚都有啲蝦碌，阿倫話：「梗有啲啦！因為現場啲人聲實在太嘈，自己啲歌啲音樂其實有啲都聽唔到。」

另外，講到阿倫講起阿Sam時表現得好感觸：「係呀，隱藏喺心入面冇講囉！係真事，其實當時係都會好擔心，當時真係同Michael（許冠文）真係兩行眼淚，但係我仲安慰Michael，相信阿Sam啦，阿Sam係得嘅，畀啲時間佢。」Sam笑言：「係呀，終於唔死得。」阿倫再笑住搭口：「仲跟跟好快就開騷囉！」

至於講到Sam喺台上爆阿倫老，「年年25歲」嘅阿倫話：「係人都知㗎啦！」阿Sam解畫：「都係想引觀眾笑啫。」問到阿倫會唔會俾阿仔個樣阿Sam睇？佢就話：「私下會俾佢睇，不過唔會公開。」咁阿Sam係咪真係只見過個後尾枕？阿Sam就話：「係呀，睇佢發出嚟嘅相就見到係咁囉。」阿Sam又笑言想見得阿倫個仔係咩樣：「聽聞好靚仔。」點知阿倫即刻話：「幻覺嚟㗎啫。」

講到阿仔好叻仔，問阿倫係咪喺阿仔畢業之後打本俾個仔開公司當獎勵？阿倫話：「我唔知你哋講乜，唔好拉開話題講呢啲啦。」咁阿仔之後發展係點，會繼續讀上去定搵工？阿倫就表示：「真係唔知，睇吓佢有啲乜嘢需要，其實佢o依家已經喺社會中做緊嘢，多謝關心。」

問到係咪真係因為流感問題所以減少咗錫錫，阿倫就話：「都驚錫完之後有啲飛沫帶俾人就唔好啦。」阿Sam好似都錫少咗喎？阿Sam就話：「唔驚流感，我有貓王抗體，對住啲歌迷，後生又錫，老又錫，肥又錫，瘦又錫，要多謝歌迷愛戴，如果鍚少咗歌迷會投訴。」