噚晚(16號)胡孟青同陳達仁到有線電視大樓錄影《正義同盟》，題目係「娛圈千后」，陳達仁係受害人之一。

除咗青姐訴苦之外，陳達仁都表示曾受「娛圈千后」所騙，佢透露自己曾經透過不同媒體講過呢件事，但係嗰時嘅力量都唔能夠凝聚到一班人去關注，估唔到呢個訪問出咗之後就就引起咗一班人關注。佢話呢件事之後就收到好多苦主嘅通知，希望可以集中到今次呢個力量令多啲人正視呢個問題。佢表示自己總共被呃咗167萬，其中140萬係開娛樂公司，當時要搵啲資深嘅娛樂人幫手去做培訓，經他人介紹下認識到「娛圈千后」。當時佢查過之後覺得唔會出錯，所以就將舊錢俾咗「娛圈千后」，後來陳達仁嘅拍檔發覺被騙後已經報警備案。

而陳達仁個人被騙嘅數目係40萬，但當時佢撞車之後以「冇錢找醫藥」為由逼「娛圈千后」還錢，所以尚欠27萬未攞返。陳表示借錢俾佢嗰時都冇欠單或者其他實質證據喺手，只可以當面對質，不過對面對質嘅話對方都唔會肯出嚟。

佢話有時候都想呢件事放埋一邊，因為成日掛喺嘴邊會令身邊嘅人或者聽眾覺得唔舒服，不過今次藉住自己仲有呢個機會同能力嘅時候舊事重提，希望可以引起多啲人關注。

另外，律師林炳昌接受訪問時話，刑事法入面有一條款叫「Similarfact」，指喺同一時間有唔同嘅人都有遇到類似事情有損失，法律上可以去證明一個人嘅心態，去判別一個人係咪有意圖去做呢件事，所以越多人去報案提供係有助事件調查之用。