如果你係開篷車迷,相信對萬事得MX-5呢個名字唔會感到陌生,皆因佢無論造型及性能表現,都予人有深刻印象嘛!然而,最近外國方面就有消息傳出,謂廠方為迎合不同車迷口味,故正落力以旗下新款M2(即日版Demio)車系作藍本,研製一款全新開篷跑車,而名稱重極有可能稱為MX-2㖭!
從預想圖中可以睇到,有望於2004至2005年間推出嘅MX-2開篷跑車,造型可算係M2及RX-8跑車嘅混合體,當中車首設計就最能夠將呢個特點展露出來;另外,當然唔少得重有照明度十足嘅頭燈及霧燈組合啦!車廂布局方面,相信會與現有M2車系相近,乘坐舒適性高之餘,設備配搭亦見齊全,但仍有待廠方公布關於此車嘅進一步資料後方可作實。該消息又指出,全新MX-2將以現有M2車系所採用嘅一台1.3公升引擎,作為主要動力核心,馬力輸出數值為70匹,輔以一套5前速手動波箱,用以驅動此車可謂綽綽有餘。若然你想一睹此車風采的話,就要留意確實推出日期喇!