中大醫學院前院長鍾尚志去完巴布亞新畿內亞做義工，呢排返咗香港，為母校香港華仁書院籌款。義助華仁做公關嘅胡雪姬話，鍾教授自言冇乜錢，惟有出力，於是諗到一個好健康嘅方法：帶領25個小師弟下月跑渣打馬拉松。原來鍾教授讀書時體育成績麻麻，40幾歲先開始多做運動，𠵱家每日練跑兩個鐘，由沙田跑去大埔，再返沙田。佢話唔知會籌到幾多錢，希望善長可以多多鼓勵吓。
鍾教授之前嗰本著作《刀下留人》反應唔錯，𠵱家埋頭寫緊第二本，就快有得睇，應該會講唔少佢喺巴布亞新畿內亞嘅體驗。