唔通阿董真係咁黑，九七之後，唔只妖魔鬼怪加沙士，連鱷魚都蒲埋頭？《蘋果》獨家報道南生圍出現食人大鱷，電子傳媒紛紛跟進，家家都影到條大鱷點樣爬行、食魚、曬太陽，獨係警方同漁護署人員一去到，條鱷魚就潛水隱形，冇晒影，連啲冇性嘅生靈，都好似同呢個政府作對，九七年九月有西方金融大鱷，今時今日就有南生圍大鱷，都咪話唔令人對呢個政府流番兩滴同情嘅鱷魚淚。

以小兒科架生對付
最慘嘅就係，漁護署同警方都承認，以往從無捉鱷魚嘅經驗，攞埋啲捉山狗、野貓嘅小兒科架生到場。對付沙士同大鱷，呢個政府都缺乏經驗，漁護署署長唔使怕：就算條鱷魚由今日起，一日生吞一個村民，𡁻夠二百九十九個，正如阿董話頭：經一事、長一智，都不必問責，毋須炒魷落台。咁條鱷魚，咪任得佢養肥啲囉，使乜咁緊張呢又？