百貨有百客，49歲中女伍詠薇呢期人氣急升。

伍姑娘喺合拍劇《飛虎之潛行極戰》中演黑幫「娜姐」（盧曼娜），入型入格，伍姑娘呢排鏡頭後都忍唔住頻頻「娜姐」上身，由於該劇拍攝時經常落深水埗街景，聯運「娜姐」決定返去掃場。

驚艷紅脣、跌膊白裇衫，腳踩高踭鞋嘅伍姑娘，坐住白色七人車殺入深水埗福榮街，原來「娜姐」呢次係有組織行動，佢第一站先到一間街坊麵包店買咗一打蛋撻，唔使5秒就吸引咗數十男女老幼街坊圍觀，街坊大叫「娜姐」，佢立即萬歲請大家食蛋撻。其中有中年男子話「娜姐」做得好，仲話如果大台唔頒視后畀伍姑娘，就去倒佢台。有男街坊用一聲「阿薇」，點中伍姑娘死穴，佢話：「我一聽佢咁叫就打冷震，好怕人咁叫我，叫我『詠薇』就得，『阿薇』唔得。」

「娜姐」出巡，街坊興奮，全街忽然熱鬧起嚟，識玩嘅伍姑娘忽然拎出玩具手槍指嚇大家，仲衝入江若琳間食肆搞搞震，用道具槍挾持女店員，難得女店員扮驚惶陪伍姑娘一齊玩。「娜姐」由街頭行到街尾，大受歡迎，唔少食肆店員都主動招手請佢食嘢，「娜姐」掃街，又食又拎。伍姑娘話：「拎埋玩具槍落嚟深水埗掃場，好過癮呀，拍《飛虎》時嚟咗呢一帶好多次，同呢度啲街坊培養咗感情，我成日屈啲街坊請食嘢，今次返嚟繼續屈佢哋。」

伍姑娘喺《飛虎》中演娜姐氣場好勁，從來事無不可對人言嘅伍姑娘，直認年少無知，中學曾被踢入會：「我承認細個時好曳，係被曳，我細個屋企窮到燶，八十年代住屋邨，嗰時我又唔鍾意書，又唔讀到band 1學校，嗰年代風氣唔好，好興踢人入社團，唔同社團會滲啲人入學校扮學生收o靚。我又反叛，鏟頭返學，咪被混入嚟啲蛇蟲鼠蟻踢我入會。」

「滲入嚟壞嘅同學帶我同兩個同學，放學去茶樓見社團話事人，佢哋去到同我哋講，跟咗佢哋就冇事，快啲交540蚊會費，我中二、中三邊有540蚊咁多錢，我話連54蚊都冇，結果傾下傾下減到$3.6都話要收。飲完茶後，浩浩蕩蕩跟人坐車去咗香港仔水塘，去到派咗一個隊長出嚟，教我哋點樣保護自己。」就係咁，伍姑娘被成為會員。大約一周後，伍姑娘上堂時，忽然有兩個警務人員闖入課室，向老師讀出伍姑娘及兩名同學名字，將佢哋帶返警署調查，伍姑娘話：「阿媽接到通知嚟咗警署，我哋當年未夠16歲，警員嚟同我落口供，告誡咗，好彩冇留案底。阿媽鬧到死，我跟住嗰個多星期唔敢返西環屋企，我去咗阿公深水埗屋企度住，避風頭。」

伍姑娘嗰次都開始知驚，但佢天生寸樣，其後雖轉校過新生活，但仍然鏟頭返學，有一日放學，被成班童黨包圍：「我一個人放學，被14個女仔圍住狂揼，記得當時有個女仔話畀我兩個選擇，一係隻揪，一係我一對佢哋咁多人，我話唔打，我要行返屋企，點知惡妹堅持話要快打，因為佢要趕船返南丫島。」伍姑娘當時淆底，唯有局打，佢話：「打交就除晒戒指同耳環，我未打過交，打一分鐘交原來好長，我又生得奀，得5呎3同人隻揪，好彩我夠狠勁，女人交點打，佢打我邊度，我照打番佢邊度，佢踢我邊度，我又踢番佢嗰邊。打到損手爛腳返屋企，我仲呃阿媽話仆親跌倒。」

「警局單嘢，阿媽省到我立立令，嗰次佢煮完飯，用木衣架打我大髀，我好捱得打。佢冇罰我，佢要為口奔馳，朝早做office清潔阿姐，黃昏出去做洗碗，根本冇時間教我。其實父母冇時間教仔女，好睇你自己條路點行。」入社團同畀童黨圍兩單嘢令伍姑娘學會自我反省同檢討，佢好快修心養性：「入過社團，之後畀人打，好驚呀，我發覺再係咁唔對路，不如考唔到成績都完成學業先，於是乖乖哋返學，群番乖嘅人。」伍姑娘少女時代反叛期就係咁維持咗兩年，佢慶幸回頭是岸：「少女反叛好壞冇得講，但嗰兩年，我過度咗，依家回想係驚，我真係邊緣少女，一線之差，點解啲人點都要我哋交3.6入會，佢要揀咁細個，13、14歲女仔，當培育到我哋16歲成年，大家都估到用佢哋做咩，我好彩叉禍咗，係個天救咗我，如果唔係，我行咗第二條路。」

精選娛聞，喺晒《娛果》
http://fb.com/appledailyent