尖沙嘴明日有大型招聘日,不過,今次唔係地產代理請人,都唔係專為雙失人士而設嘅招聘會,而係由新世界集團有份參與嘅戶外嘉年華式旅遊點,尖沙嘴海濱長廊嘅星光大道員工招聘會。
舉行地點喺正星光大道附近新世界中心,總共會請四十名親善大使同銷售員。
由新世界全資擁有嘅星光大道管理公司,執行董事袁靖罡話,應徵者條件,係「主動、肯學肯做、不怕吃虧,而又充滿笑容」。相信經過舊年經濟極度低迷之後,好多後生仔女,都會有以上嘅條件。
聽講全長四百四十米嘅星光大道,最快下月底開幕,以電影為主題。可以預見除會成為旅遊新熱點之外,附近商場一定得益良多,尤其沿海濱長廊直達嘅新世界中心,更加係如魚得水。
既為沿海增加特式旅遊點,又可以直接增加附近商場人流,有利商舖租戶生意額,遲吓業主傾續租,都聲大啲。真係一家便宜幾家着。
大圍樓快速升值
樓價日日升,有業內人士話,個市十足97年咁瘋狂。好似大圍二線屋苑金禧花園,一個四百六十三方呎單位,一名投資者舊年12月用八十二萬買入,今年1月以一百萬賣畀另一投資者,翻新後,早兩日再由第三名投資者以一百二十八萬八接手。計計數,個單位三個月間升值達五成七,最新成交呎價達2782元,雖然創新高,但美聯何良浩話,屋苑個價重係偏低,應該重有上升水位。