跑馬有時神奇到你唔信，雷神這天上半場贏一對大熱10號馬第三場「育成寶寶」及第四場「運財之星」起孖領先騎師王，之後第五、六、七場，佢分別騎13號「團圓飛舞」、4號「開心遊戲」及3號「心花怒放」，當中最叻都只係「開心遊戲」第二，雷神搏盡都未能增添頭馬。
不過去到第八場三班草地1200米，雷神一騎番大熱10號馬又掂，主角沈廐「幸運年年」上次由黎海榮跑第二，輸畀柏寶操刀同程專家「太陽喜喜」，今場雷神一擒上去，沿途居中，直路及早望空一衝，即彈甩個多身位，以無敵姿態大熱補中，四歲新西蘭自購馬第五次在港出賽，以1.8倍擂台躉姿態開齋，組合獨贏開A1派12.5元，雷神跑完第八場已中三元順利封王，騎師王提前派彩。
至於沈集成，亦憑「幸運年年」打破自上月19日贏「縱橫大地」後約一個月的頭馬荒，馬房在新一年首傳捷報。「幸運年年」馬主何壽基另有「幸運日」養於東廐，今場同「幸運年年」串Q的馬，正是東廐冷門「巴基小子」，連贏有37倍；第三名「僥倖」亦為冷門，鞍上人史卓豐這天首次入三甲，第四名至係落飛新勝馬「鑽飾飛龍」，四重彩派一萬三千幾。