英國唱作歌手James Blunt噚晚來港開騷，於亞博舉行《The Afterlove Asia Tour 2018》演唱會，除咗大唱冧歌迷粉絲外，更大爆連自己老婆迷上Ed Sheeran嘅歌，認真無面！

再度來港嘅James Blunt於約8:30開騷，一開始就孭住結他唱《Heart to Heart》炒熱氣氛，其後唱到第二首歌《Wiseman》時就大晒廣東話：「大家好，香港！」又話好多年無嚟香港見大家嘅笑臉，仲係咁叫大家企起身唔好坐，話張凳係用嚟放手袋，唔係坐！

之後唱完《Time of Our Lives》後，又再冧歌迷話：「我呢個旅程，成4個月半，當中去咗美國6個星期，又去澳洲、亞洲，為嘅就係練習好，要帶出最好嘅演出俾香港，我講真！」現場觀眾立即歡呼。

之後佢又大爆同英國天王級歌手Ed Sheeran創作出《Make Me Better》嘅故事：「呢首歌我同佢一齊寫嘅，日頭我教佢滑雪，夜晚佢教我作曲。」原來Ed鼓勵佢寫關於自己嘅家人：「最後我老婆話呢首係Ed寫過最浪漫嘅歌！」自爆老婆都迷上Ed Sheeran。接住再唱出名曲《You’re Beautiful》，全場站立更大合唱，氣氛十足。

最後個騷無刻意安排安歌時段，James一句：「嚟多首？」就即刻唱到尾，最後更搭住樂隊成員膊頭，鞠躬謝幕：「大家保重，香港，遲啲再見！」於10點正式完場。

精選娛聞，喺晒《娛果》
http://fb.com/appledailyent