【新增動新聞】
丹麥甜心盡展健美體態！美國《ESPN》將會喺7月5日推出2017年「Body Issue」特輯，繼續搵嚟喺各種項目挑戰極限嘅運動員拍攝全裸寫真照，今年23人名單中繼早前陸續公佈嘅NBA塞爾特人控衛I湯馬士（Isaiah Thomas）、MLB芝加哥小熊內罰手拜斯（Javier Baez）同NFL達拉斯牛仔跑衛艾利略（Ezekiel Elliott）之外，仲有丹麥網球手禾絲妮雅琪！

禾琪受訪時亦真情剖白，表示兒時經常被嘲笑指丹麥從未出產過世界前30網球手，要成為網球一姐只係奢談，經過征戰WTA巡迴賽12年後更迎來去年最大但潮：「我經歷過最大嘅痛楚係去年春天，當時足踝受傷仲斷咗兩條韌帶，隻腳幾乎移位，仲要喺泥地場上以全速跣地救波，結果卡住咗。翌日醫生同我講，好彩有戴保護帶，否則骨頭可能已經凸出隻腳，真係好痛。」禾琪仲大爆唔少生活趣事，包括自己家中唯一保留獎牌竟然係紐約馬拉松26.2公里組完賽獎牌，又分享自己對身體嘅睇法：「當你身處公眾風眼，一舉一動以至外貌都會被評頭品足，但我會話『你知道嗎？人們一定有意見，有人會愛錫你，有人唔會』。當我掛拍後唔會再如此着緊自己嘅體重，一切都係關乎健康生活，以及自我感覺。」