狼班子內跳船者一個接一個，無他嘅，領導嘅人太爛，下屬點肯陪佢搭沉船？原來由「梁粉」左王邵善波執掌嘅中央政策組，過去一年都湧現離職潮，至少四個高級研究主任走人，高薪都留唔住人，自然同左王有關。有政府中人話呀，左王同狼英一樣剛愎自用，堪稱政壇鬼見愁，要同佢合作愉快，談何容易？話有咁難頂嘅波士，中策組嘅跳船潮一啲唔令人意外。

事緣最近八方有朋友想搵工，有政界中人話上中策組網𥄫實最好，包保實有次會中。原來呢位心水清嘅政界中人話呀，中策組不時有招聘㗎，最近仲一次過招聘四個職位，包括唔同職級嘅行政主任同研究主任，薪金介乎1萬蚊至6萬蚊不等。
佢話計埋呢次，中策組喺狼英上任一年多，大大話話搞咗四輪招聘，每次相隔不足半年，次次都有唔同職位畀大家申請，質疑唔知係中策組風水唔好，搞到員工急住走佬？抑或係個老細太難湊，做細嘅頂唔順，惟有迫住要走？
八方向政府中人打探過，覺得係人嘅問題居多，然後大數左王事事惟佢獨尊，唔多肯聽人意見，或者呢個就係中策組大逃亡嘅原因啦。
根據政府網頁，單單係中策組嘅「高級研究主任」，一共有成七位咁多㗎。中策組回覆八方時證實，今屆政府就任一年多，高級研究主任就有四人離職。Well，狼英上任至今有三個政助同一個新聞統籌專員跳船，左王同佢有得揮喎。

mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange