周二在美國舉行的舉重世錦賽，新西蘭嘅變性選手荷柏特（Laurel Hubbard）喺女子90公斤級別贏得兩面銀牌，為新西蘭喺舉重世錦賽嘅獎牌數量實現「零的突破」，但佢賽後亦引起唔少爭議。

39歲嘅荷柏特出自新西蘭名門，老竇Dick Hubbard係前奧克蘭市長；而佢未接受變性手術、仲係男兒身嘅時候，就曾經打破新西蘭國內嘅男子105公斤級紀錄。荷柏特係今屆世錦賽喺女子90公斤級別中，抓舉造出124公斤得第二，雖然挺舉造出151公斤只得「梗頸四」，但佢總成績就得275公斤、落後美國選手羅布絲（Sarah Robles）九公斤屈居亞軍，合共收穫兩面銀牌。

雖然羅布絲成功封后，但佢嘅教練賽後都好不滿咁話：「咁樣真係好唔公平，好彩我哋最後贏到冠軍。」至於澳洲舉重協會主席基倫（Michael Keelan）就話：「若果你係男性兼可以舉到某個重量，當你變性後你都仲係有機會舉得番咁重。」

----------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM