民主黨副主席羅健熙同埋中委袁海文噚日宣佈佢哋賣獎券嘅情況。袁海文話,以往籌款晚宴可以為民主黨帶來400萬元收入,如今冇咗晚宴,400萬元中嘅200萬元就落埋入賣獎券中,民主黨聽日開始至7月9日,會喺全港18區擺100至200個街站賣獎券,目標籌460萬元。講返已經取消嘅籌款晚宴,羅健熙話本來3月搞,1月疫情開始嚴重時開始傾延期,一度諗住到夏天疫情好轉就6月搞,但係事態發展令佢哋覺得真係冇得勉強。
但淨係靠賣獎券都唔掂嘅,羅健熙話佢哋諗緊其他方式籌款,例如月捐、網上捐等等,以往晚宴、獎券並行,可以少啲落區籌款,𠵱家就要勤力啲喇。至於民主黨獎券,照舊廿蚊張,但係獎品依然豐富,頭獎有無反相機、二獎係名牌吸塵機、三獎就有名牌喇叭,而平板電腦、好多人都想要嘅氣炸鍋都有。