對香港人嚟講，北京日前公佈嘅《粵港澳大灣區發展規劃綱要》（下面簡稱《規劃綱要》），看似風光無限，但其實凶險處處。《規劃綱要》話要貫徹一國兩制，又要推動粵港澳經濟社會發展深度融合，根本就係一件好矛盾嘅事。有評論認為，北京其實想喺2047年之前耗盡香港「兩制」嘅優勢，嚟推動大灣區嘅經濟發展，然後再將香港消融於呢個區域結構裏面，最後咪可以話圓滿結束一國兩制喺香港嘅歷史任務囉。

呢個推論係咪危言聳聽，真係見仁見智，但就唔係無可能發生。事實上，香港本身就係一個國際化城市，絕對有實力協助大灣區走向世界，北京卻硬要將香港拉進大灣區內，變相令香港「降級」，被規劃成為內地一個普通城市。其實早已有人質疑，若果北京真係咁重視一國兩制，點解唔係「大灣區加港澳」，而係用「粵港澳大灣區」？係咪好似有啲人咁講，一國兩制，對於崇尚功利主義嘅北京嚟講，從來都只不過係一樣工具，可以搓圓按扁，隨時賦予新嘅意思。

有親北京媒體就話，《規劃綱要》喺前言中表示要「推動一國兩制事業發展的新實踐」，是全份綱要點睛之句。根據嗰個媒體嘅解讀，所謂「新實踐」，就係將「港澳兩個特區與祖國腹地廣東省的無縫融合。」再簡單啲講，以前係「區隔式」嘅一國兩制，以後是「融合式」嘅一國兩制；以前屬於「消極式」，以後就是「積極式」嘅一國兩制。

若果呢個解讀係正確嘅話，一國兩制唔使等到2047年，真係好快會「消磨殆盡」。《規劃綱要》所講嘅粵港澳「深度融合」，涉及科技、經貿、就業、醫療、養老及居住各個層面，之前已經有人警告，咁樣嘅融合，只會令港人身份同埋香港嘅獨特社會文化越嚟越模糊。而北京不斷鼓勵香港人到大灣區就業同生活，卻同時讓更具生產力嘅內地人到香港發展，到時居住喺大灣區嘅港人數目增多，而居港七年擁有投票權嘅內地大灣區人亦大增，足以左右香港議會選舉結果，唔排除嗰時會有人提出喺大灣區成立境外票站，方便「港人」投票，到時北京要操控香港議會選舉，真係話咁易。

依家大灣區裏面有三個獨立司法制度，一睇就知要喺經濟同社會上做到互通有幾複雜。當粵港澳深度融合後，三地民眾利益瓜葛糾纏不清，跨境刑事及民事訴訟必然增多。呢個亦正係《規劃綱要》提出要深化社會治理工作，包括司法互助、治安聯動、公共安全等方面合作嘅原因。但喺法治上，內地同香港始終有差別，單單政治罪行一項，已經充滿爭議。如果大石砸死蟹，要香港同內地喺公共安全方面夾硬「互聯互通」，點會唔傷害香港嘅法治呀？！

唔怪得有評論質疑，香港特區政府突然提出要修例，向台灣移交謀殺港女嗰單case嘅疑犯，其實背後係想乘機將修例嘅適用範圍擴展至向內地移交逃犯，呢個根本就係為咗同大灣區融合嘅佈局。再加上廿三條立法，咁香港要喺社會治理方面同大灣區做到「無縫融合」，唔係無可能。

正所謂「爛船都有三斤釘」，香港最大嘅資產始終係「兩制」，包括獨立關稅區，及擁有在金融與專業服務上嘅國際信譽同連繫，呢啲都唔係北京嘅「恩賜」，但北京似乎係想用盡香港呢啲優勢，嚟幫大灣區其他城市發展同國際化。事實上，《規劃綱要》洋洋兩萬多字，都唔見有咩篇幅講述要如何維護一國兩制，好似推動自由、民主、法治發展，嚟鞏固香港嘅經濟與社會優勢。究竟北京為咗維護一國兩制，喺呢啲地方作出咗幾大妥協、付出咗幾多代價，港人應該心中有數。如果香港既有嘅優勢都被消耗殆盡，北京仲會畀港人「享受」兩制？都係唔好妄想嘞！

花生蘋論員