當年今日
關於我們

【李華華Online】恒生「水哥」退休 轉職「行政總裁高級顧問」

蘋果日報 2019/03/20 17:29

李華華

恒生銀行(011)今日有人事變動,元老級嘅公關大員「水哥」張樹槐(Walter)話,今年5月中起將會轉做part time,唔再處理day to day工作,任「行政總裁高級顧問」(Senior Advisor to Chief Executive),服務恒生一姐、行政總裁鄭慧敏(Louisa)。
水哥回憶到,25年前應邀到恒生創辦傳訊及可持續發展部,任職兩個部門嘅總監至今,自1994年以嚟,好榮幸能夠服務已故董事長利國偉博士,以及恒生六位行政總裁,包括歐肇基、鄭海泉、柯清輝、梁高美懿、李慧敏,以及自2017年起上任嘅Louisa。
水哥話,好慶幸可以同得力及工作熱誠可嘉嘅同事共事,喺佢哋嘅努力下,負責嘅兩個部門喺香港、內地及國際上共奪得超過80個獎項,而水哥拎過《PRWeek》雜誌頒發「傑出公關專業人士大獎」,以及首位獲香港公共關係專業人員協會頒發嘅「卓越公關專業人員大獎」,都係有賴團隊的專業精神所致喎,佢最後衷心感謝各位一直支持。
作為一個馬拉松發燒友,又點會輕易言休呢?水哥同華華講,未來會喺事業上有新發展,亦會繼續跑馬拉松,下個月會到武漢跑人生第80個全馬。華華先喺度祝水哥在人生下半場繼續大放異彩。