鄭中基同梁漢文將會同香港管弦樂團合作，下個月14至16日喺紅館舉行「港樂鄭中基．梁漢文演唱會」，為咗配合個唱，更推出咗新歌《天跌下來》（暫名）嚟配合。
歌手同管弦樂團合作，慣例都嚴謹啲，問佢兩個會唔會着衫隆重啲、講嘢正經啲嚟配合，兩個都話會，但一秒鐘之後已經口多多。梁漢文話：「對自己嘅衫同態度都會係grand中之grand，但班樂手同我哋講唔想咁隆重，不如大家夾埋着T恤唱歌。」坐喺側邊嘅鄭中基搭嘴話：「可以全隊人着拖鞋出場。」梁漢文聽到即刻口臭話：「唔得，一陣踩踩吓樂器咪甩拖？」二人隨後正經咁話可以一套隆重、一套casual。

十年緣份到

今次可以同管弦樂團合作，梁漢文最開心，佢話：「97年我已經好恨做，但一直冇機會，今次緣份到，會成為我哋事業中重要嘅一件事。」兩個人喺騷度會互唱對方嘅歌之外，仲會表演唔同樂器。