日本組合AKB48前一姐前田敦子，離隊三年雖然未至於大紅大紫，但係總算不停有戲拍又做舞台劇，佢間中都會去欣賞其他舞台劇交流下心得，據今日出版嘅八卦雜誌《女性SEVEN》報導，前田早前去睇由松隆子、井上真央、瑛太等人主演嘅舞台劇《逆鱗》，現場仲有好多明星捧場，包括生田斗真、山田優等，不過，前田竟然被場內職員請離場。

原來前田當日戴住一頂帽坐喺觀眾席，場內已有廣播叫觀眾除帽，以免影響到其他觀眾視線，但前田當聽唔到，一直戴住帽，有劇場職員同佢講過幾次，佢都依然故我，結果被劇場職員請離場，認真瘀爆。但據該周刊指，前田離席後過咗一段時間再入番場內，佢終於都冇戴帽。唔知佢係咪冇梳頭，除帽後要去梳番好個頭先至再出現呢？

而近日前田開設咗新Instagram戶口，原來佢兩年前曾經開過，之後一直冇更新，今次再開似乎係為佢套新劇《毒島百合子的赤裸裸日記》同埋新片《雞冠返故鄉》宣傳。