愛華頓喺今季英超成績唔差，原來佢哋嘅梯隊U23愛華頓，喺英超二級聯賽成績都好好，目前位列榜首，原因可能係班球員個個捱得苦，天寒地凍都唔可以戴手套。

U23目前由球員時代長時間效力愛華頓嘅安斯禾夫領軍，佢唔單止唔准球員戴手套比賽，甚至喺集訓都一樣照禁，連張對襪拉上過膝頭都唔得，認真嚴格。安斯禾夫認為，呢個階段嘅球員係唔需要咁多呢類裝備，一心踢好波就得。