今年韓國電影圈有唔少佳作推出，繼黃政民、宋仲基、蘇志燮主演嘅《軍艦島》，以及宋康昊、劉海鎮及柳俊烈主演嘅《逆權司機》之後，由大陸女星趙薇嘅男神河正宇(相關新聞連結： http://bit.ly/2xtiPEA )、車太鉉、金荷娜、朱智勛、EXO嘅D.O.主演嘅《與神同行》將會於12月20號壓軸喺韓國登場。

電影商噚日公開《與神同行》首個預告及海報，當中海報充滿《鬼怪》feel，電影係改編自同名漫畫，講述車太鉉飾演嘅消防員死後被帶到地獄，並要喺49日內喺7個唔同嘅地獄接受審判嘅故事，河正宇同朱智勛都飾演地獄使者，而李政宰將會以閻羅王一角特別演出。

《與神同行》將會分為兩部推出，當中第一部會於今年12月20號上映，第二部會於明年夏天上映，電影拍攝時期長達10個月，當中拍攝一直好保密，從未公開劇照，所以今日公開預告及海報後，影迷都話好期待，加上有咁多大卡士主演，令外界都睇好係年底壓軸巨作。

《與神同行》預告： http://bit.ly/2htYVTz