「啲同學個個都索，我冇理由衰畀佢哋睇，所以咪學人索囉。」目睹卓慧妍在的士高索K出事的啤酒女郎阿寶，原來亦曾濫藥，她第一次索K亦是在的士高。「當時我15歲都未夠秤入場，要借人身份證；一落到場就有人請索嘢！開頭都冇乜感覺，索咗三次先覺得興奮、衝動，個人好易同人炒（爭執）。」
四年前讀中三的阿寶，在同學影響下開始到沙田蒲D，踏上了索K之路。「以前一個星期起碼落兩次D，每次都索到唔識返屋企，後來索K都冇感覺，要撞埋5仔先high。」雖然數月前開始戒K，但幾年濫藥，令阿寶常胃痛、手震、視覺模糊及記憶力衰退。
去年開始在旺角一間的士高任啤酒推銷員的阿寶透露，「口靚妹仔」入到油尖旺所有D場，都會有人請索免費K，當中不少人企圖不軌，例如藉對方不清醒下「抽水」，甚至作出性侵犯，或偷取其身上的手機、錢包等財物。

「斷估唔會有人害自己」

生長在中產家庭、現正在澳洲攻讀大學的慧慧，亦曾是索K少女，「15歲時跟同學去私竇、卡拉OK玩，當時同男朋友成班一齊玩，玩到癲晒就索K，諗住成班都係自細玩到大嘅朋友，又有男朋友在場，斷估都唔會有人害自己。」
慧慧說：「當時K仔成200蚊粒，邊會有人用咁貴嘅嘢嚟害你呀！」慧慧學業成績因而一落千丈，屋企人急急送她到澳洲讀書。「好多女仔同我一樣，以為成班朋友一齊索K，有事時會有人照應，但真係出事時，個個都怕惹事上身。」