獲民建聯悉心栽培嘅「EQ」葛珮帆，一身霉氣，商台同iProA有佢都黑過墨。由一班80後高登巴打自資創辦嘅雜誌《二字頭》，居然畀塊地盤佢亂噏反普選，高登巴打向來反共，梗係㷫，群起質疑《二字頭》係隱形左刊，於是向影視處報寸話雜誌冇註冊，搞到出咗三期就要停刊。

被揭冇註冊

《二字頭》7月創刊，8月號訪問長毛、EQ、「牛河博士」曹宏威同高登CEO林祖舜點睇80後。EQ指點80後，話唔好將事情簡單化，「例如有人以為香港有了普選，所有問題就會迎刃而解，政府就會做得更好」。
高登巴打最㷫係雜誌打着由高登巴打製作，卻幫左派宣傳，所以群起叫要停刊，除咗揭冇註冊，仲有巴打入去做無間道，探聽內部資料再公開。
總編JefferyLam話佢哋正向影視處辦理註冊手續，遲啲一定會復刊。《二字頭》頭兩期發行各5,000本，9月號（圖）已去到7,000本，由於係免費，Jeffery話廣告收入不足支出，成員要夾錢先出到。