一年一度嘅港姐選舉即將進行招募活動，歷屆港姐亦受命出席宣傳活動，之不過喺今年嘅宣傳短片上，只係見到陳凱琳、邵佩詩、麥明詩同馮盈盈幾個冠軍級人馬，連16年亞軍劉穎鏇都有份參與宣傳，反而唔見應屆冠軍雷莊𠒇(Juliette)，唔知「被消失」係咪同啲負面新聞，抑或係卸任後返加拿大有關？（新聞連結： https://bit.ly/2HeCYiw　）

今日Juliette喺將軍澳出席活動，又被問到呢件事，佢話：「我唔係咁知道佢哋點樣安排，可能嗰刻我喺加拿大。」講到卸任前有冇工作安排？佢話︰「暫時有啲善事（慈善）活動，下星期有個dragon boat（龍舟），好開心可以做嗰個，其實嗰日係我中國生日（農曆生日），到時一路慶祝兼食好多糉，噚晚我婆婆開始整晒嗰啲（材料），我最鍾意食糉。」

講到會唔會覺得有好多是非？佢就話︰「我覺得都唔會，可能有時俾人影俾人寫，記者寫嗰啲，其實我冇乜跟，係我啲朋友話返俾我聽，咁都唔介意，因為香港都，我好use to …每一次我都慣咗，所以都冇乜介意。」唔知有冇影響工作嘅心情？佢就話︰「都唔會，我知道自己做緊乜嘢，我對自己嘅信心都冇乜影響，覺得自己知道做得最好。」生日願望方面，佢笑言︰「希望今年可以開心啲，快啲搵工作，同埋返到去加拿大見返啲好朋友，好掛住佢哋。」

另外，提到今日有報道指她與男友人到酒店慶祝生日一事，Juliette強調加拿大嘅男友都認識嗰位男性友人，佢仲話男朋友今朝早亦已送上珍珠耳環做生日禮物，相信7月返加拿大時，男友一定會同佢補祝生日。

精選娛聞，喺晒《娛果》
http://fb.com/appledailyent