和平佔中發起人陳健民噚日突然喺facebook分享多幅從未曝光陳年舊相，唔少網民睇到，都讚佢好靚仔好青春，有人仲話有「坤哥」吳業坤feel㖭。陳健民同八方講，之所以喺儲物櫃翻出舊相，係因為半島電視台最近聯絡佢，話計劃開拍一輯有關雨傘運動嘅深入紀錄片，希望外國觀眾了解佔領運動唔係突然間「爆出來」，就好似佢當年已經為抗議中共鎮壓六四而向中國領事館掟雞蛋！
睇番舊照，陳健民笑言當年好嫩口，因為常要通宵工作，好多時都喺油印房瞓過夜。陳健民話，其中一張相係1985年政總外示威，當年自己做社工搞過唔少運動，最終成功爭取起咗東區醫院。佢話當年遊行有200人參加已好犀利，同𠵱家遊行隨時有十萬八萬人差好遠，「現時公民社會覺醒咗，令人感到30年來的變化。」

同劉千石拍住上

去到1986年，陳健民帶住百萬港人嘅簽名上京，要求暫停興建大亞灣核電廠，見到佢同劉千石拍住上。陳健民透露，當年同阿石成立咗個「監管公共事業聯委會」，經常反對巴士同電費加價，雖然兩人後期政見已不同，近年更已冇乜聯絡，佢至今都好尊重阿石對基層貢獻良多。
唔睇相唔知，原來陳健民早喺1989年已經「雞蛋抗高牆」，飛美國去到當年最大嘅中國領事館外抗議中共屠殺學生，佢唔只扎起頭巾，仲同現場學生向領事館掟雞蛋，當年政府都好包容，佢同學生都冇因此被捕。

李八方
mailto:[email protected]