莊思敏、日籍模特兒清穗久美子、柯嘉琪、吳綺珊及李君妍等，今日喺灣仔出席為香港乳癌基金會籌款嘅活動，莊思敏話自己每年都會進行身體檢查:「女仔二十五歲就應該定期檢查，我媽咪都患過乳癌，所以自己都會幾小心。」曾經隆過胸嘅佢又話隆胸唔會增加患乳癌風險。

講到好友黃秋生被傳喺內地封殺名單入面，莊思敏就話：「傳啫，應該唔係咁嚴重，佢0依家內地拍緊嘢，都約咗返嚟食飯，食飯先傾囉，無謂增加佢壓力，佢自己都有拎呢樣嚟講笑。」

聽日就喺雨傘運動一個月，莊思敏敏就坦言「冇眼睇」，佢話：「幾冇眼睇，都見唔到出路，好似喺死胡同咁。立場唔同，好難評論，希望和平解決。」

至於清穗久美子就話開心可以幫到乳癌基金籌款，佢話雖然身邊冇人患乳癌，不過祖父係因為胃癌過身，所以自己都有患癌風險。

問佢有冇定期做身體檢查？佢話:「返日本時會做，因為政府會免費或者資助。」佢又話0依家自己會早睡早起，同埋食得健康啲養好身體。

講到已持續一個月嘅雨傘運動，佢就話：「我住嗰度近旺角，都有少少影響，可能行返屋企時要兜路，不過都好驕傲香港人站出嚟講自己訴求。」